相信有睇開足球嘅史友都知西班牙皇家馬德里同巴塞隆拿係死對頭，而呢對宿敵嘅歷史淵源，唔多唔少都同西班牙已故獨裁者佛朗哥有啲關係，今日就同大家介紹吓。

佛朗哥喺1936年發動政變，經歷3年內戰之後，擊敗共和軍、統一全國。而巴塞隆拿就係共和軍嘅重要據點，佛朗哥當時下令屠殺1.5萬名共和軍以及2.5萬名共和軍支持者，自此巴塞隆拿同加泰羅尼亞嘅人非常痛恨佛朗哥。

佛朗哥非常重視足球，認為足球可以幫助西班牙打破孤立，播放比賽亦可分散人民注意、減少示威，而佛朗哥支持皇馬，亦多次出手介入比賽，打擊加泰隆尼亞嘅象徵巴塞隆拿。喺1943年嘅國王盃四強比賽，巴塞喺首回合以3:0領先皇馬，喺次回合比賽之前，佛朗哥就派人去巴塞更衣室恐嚇球員，最終巴塞喺呢場比賽輸11:1出局。

上世紀50年代，皇馬同巴塞都希望簽入阿根廷球王迪史提芬奴，當時巴塞同迪史提芬奴談判進展非常順利，迪史提芬奴亦曾為巴塞踢過幾場友誼賽，當時佛朗哥就派人禁錮咗巴塞主席，迫使巴塞放棄簽入迪史提芬奴，成功將迪史提芬奴撬過去皇馬。迪史提芬奴效力皇馬期間，曾經為皇馬响1955年至1960年期間連奪5屆歐冠盃，呢個紀錄至今仍未有其他球隊打破。

原圖取自網絡。